Շենքերի էներգաարդյունավետ արդիականացումը ՄԱԿ-ի Կայուն զարգացման նպատակներին հասնելու միջոց

Միավորված ազգերի կազմակերպության Կայուն զարգացման նպատակները (ԿԶՆ) համաշխարհային կոչ են վերացնելու աղքատությունը, պաշտպանելու շրջակա միջավայրը և կլիման, ինչպես նաև ապահովելու, որ աշխարհում բոլոր մարդիկ ապրեն խաղաղ և բարեկեցիկ կյանքով։

Այս նպատակներին հասնելու միջոցներից է էներգաարդյունավետությունը, որը նպաստում է էներգիայի ծախսերի կրճատմանը՝ թեթևացնելով բազմաթիվ ընտանիքների ֆինանսական բեռը և օգնում է պայքարել կլիմայի փոփոխության դեմ՝ նվազեցնելով ջերմոցային գազերի արտանետումները: Էներգաարդյունավետ շենքերը նպաստում են հասնել կայուն զարգացման այնպիսի նպատակների, ինչպիսիք են՝ մատչելի և մաքուր էներգիան (ԿԶՆ 7), անհավասարության կրճատումը (ԿԶՆ 10), ամուր առողջությունը և բարեկեցությունը (ԿԶՆ 3), կայուն քաղաքները և համայնքները (ԿԶՆ 11):

Հայաստանում էներգաարդյունավետությանն ուղղված կարևոր ծրագրից է ՄԱԶԾ-ի, Կլիմայի կանաչ հիմնադրամի և ՀՀ կառավարության կողմից համաֆինանսավորվող «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ծրագիրը։ Այն Հայաստանի տարբեր քաղաքներում շենքերի էներգաարդյունավետ վերազինման միջոցով բարելավում է քաղաքացիների կյանքը միևնույն ժամանակ ճանապարհ հարթելով դեպի ավելի կայուն ապագա:

Ստեփանավանցի Շուշանիկը մեկն է այն բազմաթիվ բնակիչներից, ում ընտանիքի առօրյան զգալիորեն բարելավվել է շենքի էներգաարդյունավետ արդիականացման արդյունքում: Նա ամուսնու հետ երեք երեխաների է մեծացնում, և ասում է, որ ընտանիքի բարեկեցությունն ապահովելու համար ժամանակ առ ժառամակ բախվում են ֆինանսական խնդիրների՝ հատկապես ձմռան ամիսներին։

 
«15 տարի կլինի, ինչ ապրում ենք այս շենքում, և առաջին անգամ է, որ մեր բնակարանում ձմռանը տաք էր առանց ջեռուցման»,- ասում է Շուշանիկը։ «Շենքում բոլորը շատ գոհ են։ Հիմա հարմարավետ, գեղեցիկ շենք ունենք։ Փոփոխությունները գալիորեն որը բարելավել են մեր կյանքի որակը»:

 


Նրա շենքը Ստեփանավանի ինը շենքերից մեկն է, որն արդիականացվել է ծրագրի շրջանակում: Այժմ, ջեռուցման վրա ավելի քիչ ծախսելով Սաթենիկը կարող է գումար խնայել և ավելի արդյունավետ կառավարել իրենց ընտանիքի բյուջեն։

«Նկատել եմ, որ մեր կոմունալ ծախսերը զգալիորեն նվազել են։ Նախկինում յուրաքանչյուր սենյակ ջեռուցում էինք առանձին՝ էլեկտրական տաքացուցիչներով, իսկ հիմա բնակարանը մնում է տաք առանց որևէ ջեռուցման։ Էլ չեմ անհանգստանում,որ երեխաներս կմրսեն:»

Շենքի արդիականացման շրջանակում ջերմամեկուսացվել են շենքերի արտաքին պատերը, տանիքը և նկուղը։ Փոխարինվել են նաև շենքի հին պատուհաններն ու դռները՝ էներգաարդյունավետ տարբերակներով: Բացի այդ, շենքում տեղադրվել են ժամանակակից լուսադիոդային լամպեր՝ ընդհանուր տարածքներում ապահովելու բնակիչների անվտանգությունն ու հարմարավետությունը: Այս փոփոխություները զգալիորեն նվազեցրել են էներգիայի օգտագործումը ՝ նպաստելով կայուն զարգացման 11-րդ ՝ Կայուն քաղաքներ և համայնքներ նպատակին։

Էներգաարդյունավետ արդիականացումը նաև բարելավել է 66-ամյա թոշակառու Մեխակ Եղիազարյանի և նրա ընտանիքի առօրյան։ Վերջինս նշում է, որ փոփոխություններից հետո կոմունալ ծախսերը կրճատվել են, իսկ բնակարանը բավականին տաքացել է։

 
«Այս բնակարանում ապրում եմ կնոջս և տղայիս ընտանիքի հետ։ Մեր բնակարանում շատ տաք է հիմա։ Այժմ ջեռուցման համար վճարում ենք մոտ 20,000 դրամ (մոտ 50 դոլար), համարյա կրկնակի քիչ։ Նաև ուզում եմ նշել, որ տարիներ շարունակ մեր շենքում բորբոսի խնդիր ունեինք, բայց բարելավումների շնորհիվ այն վերջապես վերացել է»:

Շենքերի էներգաարդյունավետ արդիականացումն օգնում են Շուշանիկի և Մեխակի նման բնակիչներին լինել ավելի առողջ՝ ապահովելով նրանց բարեկեցությունը, ինչը անմիջականորեն կապվում է ԿԶ 3-րդ «Լավ առողջություն և բարեկեցություն» և ԿԶ 11-րդ՝ «Կայուն քաղաքներ և համայնքներ» նպատակների հետ:

Հարևան շենքերի բնակիչները ևս ցանկություն ունեն են նմանատիպ փոփոխություններ տեսնել իրենց տներում: Նազիկ Հովհաննիսյանը, ով ապրում է հարակից շենքում, նշում է որ ձմեռներն իր ընտանիքի համար իսկական մարտահրավեր են, քանի որ բնակարանը տաքացնելը թանկ արժե։

 
«Մեր շենքերում ցուրտ է։ 14 տարի է այստեղ ենք ապրում ու տանը սովորաբար սառն է լինում, քանի որ արևի լույսը շատ քիչ է ընկնում: Ձմռանը ջեռուցման համար վճարում ենք մինչև 70,000 դրամ (մոտ 180 դոլար), որը շատ է։ Ես ու հարևաններս հույս ունենք որ մեր շենքը ևս շուտով կարդիականացվի, քաղաքապետարանին արդեն դիմում ենք գրել»,- ասում է Նազիկը:

Շենքերի էներգաարդյունավետ արդիականացումը մարզերում քաղաքացիների կյանքը բարելավելու բազմաթիվ ուղիներից մեկն է, որը նպաստում է մի քանի ԿԶՆ-ներին հասնելուն. ապահովում է ավելի բարեկեցիկ պայմաններ, զգալիորեն քչացնում է քաղաքացիների ֆինանսական բեռը՝ նպաստելով աղքատության նվազեցմանը և օգնում է մեղմել կլիմայի փոփոխության արդյունքում առաջացած խնդիրների հետևանքները։ Այս նախաձեռնությունը հնարավոր է դարձել ՄԱԶԾ-ի, Հայաստանի կառավարության և Ստեփանավան համայնքի համագործակցության շնորհիվ և կրելու է շարունակական բնույթ։

Սկզբնաղբյուրը՝ https://www.undp.org/