Ալավերդիում կանայք «կանաչ լույս» են վառել էներգաարդյունավետության համար

Կարինե Սիմոնյանը վառ և տարբերվող անհատականություն է՝ Ալավերդի համայնքում ղեկավար պաշտոն ունի, քաջ ծանոթ է բնակիչների խնդիրներին, պատկերացնում է դրանց լուծումները և իր փոքրիկ թիմով նախագծում զարգացման տարբեր ծրագրեր:

Անմիջական կապ ունի ՄԱԶԾ-ԿԿՀ «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ծրագրի հետ, որովհետև իր ղեկավարած «Զարգացման ծրագրերի և տուրիզմի բաժինն» է հետևում ծրագրի հաջող իրականացմանը Ալավերդիում: Ինչպես նաև աջակցում ծրագրի շրջանակում համայնքում ներդրված էներգետիկ կառավարման համակարգի աշխատանքներին:

Ուշադիր է մանրուքներին, հետևողական է աշխատանքի որակին: Համայնքում շենքերի էներգաարդյունավետ արդիականացման մասին խոսելիս շատ է կարևորում կանանց վճռական դերակատարումը: Հավատացնում է՝ վերջիններս շատ լավ տեղեկացված են էներգաարդյունավետ լուծումներից, գիտեն դրանց ներդրման արդյունքում ինչպես կարող է փոխվել իրենց ապրելու միջավայրը:

Կարինեն նշում է, որ բնակիչները գնալով ավելի են հետաքրքրվում էներգաարդյունավետ վերանորոգման ծրագրերով. քաղաքապետարանը ստանում է ավելի շատ հայտեր, քան երբևէ: Դրանց մեծ մասը ստացվում է ուղիղ բնակիչներից, ովքեր մանրամասն նկարագրում են իրենց շենքերի վիճակը և մատնանշում ամենահրատապ կարիքները:

«Դիմումները ստորագրած բնակիչների գերակշիռ մասը կանայք են, սա նշանակում է, որ նրանք իրենց միջավայրն ավելի հարմարավետ դարձնելու պահանջ ունեն և ավելի նախաձեռնող են»: 

Ստացվում է՝ Ալավերդիում կանայք մեծ ցանկություն ունեն ապրելու էներգաարդյունավետ պայմաններում՝ունենալ ջերմային հարմարավետություն, նվազեցնել կոմունալ վճարները, նպաստել էներգետիկ աղքատության և ջերմոցային արտանետումների կրճատմանը:

«Այս պահին չեմ կարողանում հիշել վերջին ամիսներին գրանցված գոնե մեկ դեպք, երբ Ծրագրի մասին տեղեկատվություն ստանալու նպատակով մեզ տղամարդ դիմեր: Կանայք ավելի հեռատես են այս հարցում»,-նկատում է Կարինեն:

Ալավերդիում կանայք բավականին ակտիվ են հասարակական կյանքի տարբեր ոլորտներում և կարևոր դերակատարում ունեն ոչ միայն իրենց ընտանիքի, այլև շենքի, թաղամասի և համայնքի համար կայացվող որոշումներում:

«Այսօր հիմնականում կանանք են վարում կենցաղը, պլանավորում ընտանեկան բյուջեն: Այդ պատճառով էլ ցանկանում են տանն ունենալ ջերմային հարմարավետություն, որպեսզի երեխաները հաճախ չհիվանդանան, ընտանիքի անդամները հարմարավետ ապրեն»,-ասում է նա:

Նրա խոսքով, շենքերի ջերմաարդիականացման ևս մեկ կարևորագույն ազդեցություն էլ դրամային խնայողությունն է. խնայված գումարները կանայք հաճախ ուղղում են իրենց արտաքին տեսքին, գնում են խնամքի միջոցներ, հագուստ և դրանից նրանց տրամադրությունը էապես բարձրանում է:

«Ստացվում է՝ տնտեսումը երջանկության բաղադրիչ ունի, որն էլ ազդում է ընտանիքում առողջ մթնոլորտի ձևավորմանը: Հատկապես համայնքներում ապրող կանայք, ովքեր զբաղվածության լուրջ խնդիր ունեն, հետաքրքրված են այնպիսի փոփոխություններով, որոնք գումարի խնայողություն են բերում»:

Սկզբնաղբյուրը՝ https://www.undp.org/armenia/