Ներկայացվել են էներգաարդյունավետության վերաբերյալ հանրային կարծիքի ուսումնասիրության արդյունքները

Դեկտեմբերի 18-ին «Էներգաարդյունավետության հետ առնչվող հիմնահարցերի վերաբերյալ հասարակական կարծիքի ուսումնասիրության իրականացում Երևանում և ՀՀ մարզերում» հետազոտության արդյունքները ներկայացվեցին լրատվամիջոցների ներկայացուցիչների, գործընկեր պետական կառույցների հասարակայնության հետ կապերի մասնագետների և այլոց քննարկմանը:

Հետազոտությունն իրականացվել է «Կոմպասս բիզնես գրուպ» ընկերության կողմից 2025թ-ի օգոստոս-սեպտեմբեր ամիսներին ՀՀ շրջակա միջավայրի նախարարության «Բնապահպանական ծրագրերի իրականացման գրասենյակ» (ԲԾԻԳ) ՊՀ պատվերով՝ ՄԱԿ-ի Զարգացման ծրագրի և Կլիմայի կանաչ հիմնադրամի (ՄԱԶԾ-ԿԿՀ) «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ծրագրի շրջանակում։

Բավական ներկայացուցչական հարցման (ընդգրկվել են Հայաստանի բոլոր մարզերն ու Երևանը, ինչպես նաև տարբեր տարիքային, սոցիալական և մասնագիտական խմբեր) արդյունքում գնահատվել է հանրային իրազեկվածության մակարդակը և տեղեկատվական միջավայրը, որը կարող է ազդել բնակչության՝ էներգաարդյունավետության ծրագրերին մասնակցության վրա։
էներգաարդյունավետության գաղափարին ծանոթ է եղել հարցվածների 56.2%-ը , իսկ 46.9%-ը նշել է, որ էներգաարդյունավետության ծրագրերը զգալիորեն նպաստում են ծախսերի նվազեցմանը, ջերմության պահպանմանը և բնակարանի հարմարավետության մակարդակի բարձրացմանը:

Հարցվողների 85.9%-ը բավարարված է եղել «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ծրագրի շրջանակում իրենց շենքում իրականացված էներգաարդյունավետության բարձրացման միջոցառումների արդյունքից։

Հետազոտության արդյունքների ներկայացման միջոցառման ընթացքում Հայաստանում ՄԱԶԾ մշտական ներկայացուցիչ Նաթիա Նացվլիշվիլին նշեց, որ ծրագրի ավարտին կարևոր է հասկանալ, թե ինչ պատկերացումներ ունեն Հայաստանի բնակիչները էներգաարդյունավետ արդիականացման և մարդկանց կյանքի որակի վրա վերջինիս ունեցած ազդեցության վերաբերյալ։

«Հպարտ ենք տեսնել մեր շարունակական ջանքերի արդյունքը․ Հայաստանի բնակչության ավելի քան կեսն արդեն հստակ պատկերացում ունի էներգաարդյունավետության մասին։ Միևնույն ժամանակ, մենք գիտակցում ենք, որ հանրային իրազեկվածության բարձրացումը պետք է մնա առաջնահերթություն: Բնակչության շրջանում էներգաարդյունավետ լուծումների պահանջարկի ավելացումն ոչ միայն կխրախուսի ավելի «կանաչ» գործելակերպը, այլև կնպաստի երկրի առաջադեմ քաղաքականության զարգացմանը»,- նշեց նա։

Ծրագրի առաջին բաղադրիչի համակարգող, ՇՄՆ ԲԾԻԳ ՊՀ ներկայացուցիչ Արմեն Աջամօղլյանի խոսքով՝ վերջին չորս տարիների ընթացքում՝ որպես գործընկեր, տարբեր միջոցառումներով նպաստել են էներգաարդյունավետության թեմայով հանրային իրազեկվածության մակարդակի բարձրացմանը։ Այս գործում, ըստ նրա, մեծապես օգնել են տեղական լրատվամիջոցները, նրանք պատրաստակամորեն լուսաբանել են Ծրագրի շրջանակում իրականացված միջոցառումներն, արդյունքներն ու շահառուների կյանքում արձանագրված փոփոխությունները:

«Մենք բարձր ենք գնահատում լրատվամիջոցների հետ այս համագործակցությունը, որի արդյունքը որոշակիորեն արտացոլված է նաև այս հետազոտության մեջ: Հուսով եմ, որ ստացված արդյունքները հետագայում կօգնեն պետական համակարգում քաղաքականություն մշակողներին և որոշումներ կայացնողներին առավել թիրախային գործելու»,- նշեց նա։

Հետազոտության հայերեն տարբերակը հասանելի է այստեղ: