ՄԱԶԾ-ն խթանում է կանաչ ֆինանսավորումը Հայաստանի էներգաարդյունավետ բնակարանաշինության ոլորտում

Հայաստանում ՄԱԿ-ի Զարգացման ծրագիրը (ՄԱԶԾ), ՀՀ Կենտրոնական բանկի և Հայաստանի բանկերի միության հետ համագործակցությամբ, կազմակերպեց ինտերակտիվ աշխատաժողով՝ շենքերի ոլորտում կանաչ վարկավորման՝ բանկերի կարողությունների զարգացման թեմայով։ Միջոցառումը համախմբեց առևտրային բանկերին և առաջատար վարկային կազմակերպություններին՝ քննարկելու այն լուծումները, որոնք կնպաստեն կանաչ ֆինանսական գործիքների ընդլայնմանը՝ աջակցելով բնակարանաշինության ոլորտում իրականացվող էներգաարդյունավետ վերանորոգումներին։

Հիմք ընդունելով Հայաստանում էներգաարդյունավետության ոլորտում ՄԱԶԾ-ի երկարամյա աջակցությունը՝ աշխատաժողովում ներկայացվեցին ինչպես նախկին ազգային և միջազգային խորհրդակցությունների արդյունքները, այնպես էլ Բեռլին Էկոնոմիքսի (Berlin Economics) և Մոդեքսի (Modex) կողմից իրականացված ընթացիկ վերլուծական աշխատանքների եզրահանգումները։

Վերլուծությունները կենտրոնացած էին Հայաստանում առկա կանաչ ֆինանսական պրոդուկտների գնահատման, ինչպես նաև բանկերի և վարկային կազմակերպությունների կարողությունների վրա՝ էներգաարդյունավետ արդիականացման համար կանաչ վարկային պրոդուկտներ մշակելու, ներդնելու և կառավարելու տեսանկյունից՝ առանձնահատուկ ուշադրություն դարձնելով բազմաբնակարան շենքերին։

Քննարկումների արդյունքում մշակվեցին նախնական քաղաքականության առաջարկություններ և գործողությունների ուղղություններ, որոնք շահագրգիռ կողմերի հետ հետագա քննարկումներից հետո կվերջնականացվեն և կներկայացվեն քաղաքականություն մշակողներին։ Այդ առաջարկությունները նպատակ ունեն բարելավել շենքերի էներգաարդյունավետ արդիականացման համար կանաչ ֆինանսավորման հասանելիությունն ու կիրառելիությունը՝ հատկապես բնակարանային հատվածում։

Աշխատաժողովը կարևորեց շահագրգիռ կողմերի համատեղ պատասխանատվության գիտակցումը։ Բանկերը վերահաստատեցին իրենց պատրաստակամությունը՝ կատարելագործելու և բազմազանեցնելու կանաչ վարկային պրոդուկտները, իսկ ազգային գործընկերները շեշտեցին համագործակցության ամրապնդման անհրաժեշտությունը բազմաբնակարան շենքերի համատիրությունների և այլ շահառուների հետ։

ՄԱԿ-ի Զարգացման ծրագրի և Կլիմայի կանաչ հիմնադրամի «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ծրագրի շրջանակում իրականացվող այս նախաձեռնությունը ընդգծում է Հայաստանի հանձնառությունը՝ իրականացնել մատչելի ու կայուն էներգաարդյունավետ վերանորոգումներ՝ հատուկ ուշադրություն դարձնելով կանանց և խոցելի խմբերին։

Աշխատաժողովը նշանակալի քայլ է Հայաստանի էներգաարդյունավետության հավակնոտ նպատակները շոշափելի լուծումների վերածելու գործում, որոնք օգուտ կբերեն համայնքներին, կնվազեցնեն էներգետիկ աղքատությունը և կխթանեն երկրի կլիմայական պարտավորությունները: