Դեպի ավելի կայուն ապագա. Երևանի թիվ 36 մանկապարտեզի էներգաարդյունավետ փոխակերպումը

Հնգամյա Մերին ամեն առավոտ մեծ ոգևորությամբ հաճախում է Երևանի թիվ 36 մանկապարտեզ։ Իսկ երբ խոսում է իր երկրորդ տան մասին՝ աչքերը պարզապես փայլում են. լավ լուսավորությամբ սենյակներ, գունեղ և ջերմ միջավայր, սիրելի դաստիարակներ ու ընկերներ։ «Էստեղ շատ սիրուն է ու ես սիրում եմ իմ մանկապարտեզը, որովհետև ամեն օր նոր բաներ եմ սովորում», - ասում է Մերին։

Պատահական չէ, որ Մերին այդքան սիրում է մանկապարտեզը։ 1970-ականներին կառուցված մանկապարտեզի շենքը, որը վերջին տարիներին գտվնում էր անմխիթար վիճակում, վերջերս հիմնանորոգվել է և դարձել էներգաարդյունավետ և ավելի հարմարավետ։

Այս փոխակերպումը հնարավոր է դարձել Երևանի քաղաքապետարանի և միջազգային դոնորների՝ Եվրոպական ներդրումային բանկի, Արևելյան Եվրոպայի էներգախնայողության և շրջակա միջավայրի գործընկերության հիմնադրամի, Կանաչ կլիմայի հիմնադրամի և ՄԱԶԾ համագործակցության արդյունքում՝ «Երևանի էներգաարդյունավետություն» ծրագրի շրջանակում։

Խորհրդային տարիներին կառուցվելուց ի վեր Երևանի տասնյակ մանկապարտեզներ չեն հիմնանորոգվել, մինչդեռ մանկահասակ երեխաների համար բարեկեցիկ անվտանգ, հարմարավետ և ներառական միջավայրը միջավայրն ուղղակի անհրաժեշտություն է։ Հիմնանորոգումից հետո Երևանի թիվ 36 մանկապարտեզում ամբողջապես փոխվել են շենքային պայմաններ և այժմ մոտ 300 երեխաների առօրյան անցնում է ավելի ապահով և բարեկեցիկ միջավայրում։

Դաստիարակ Նորա Անդրեասյանը, ով ավելի քան 20 տարի է ինչ աշխատում է թիվ 36 մանկապարտեզում նշում է, որ փոփոխությունները հսկայական են։

«Շենքը տարիներ շարունակ անմխիթար վիճակում էր. մանրահատակը պոկված էր, պատերը՝ անգույն, կահույքը՝ հին։ Տաք ջուր չունեինք։ Իսկ պատուհաններն այնքան վատ վիճակում էին, որ չէինք կարողանում ձմռանը նորմալ տաքություն ապահովել ու ստիպված դրանք ծածկում էին պոլիէթիլենային թաղանթով։ Հիշում եմ ձմռանը երեխաների ձեռքերը սառը ջրից ուռչում էին։ Բայց հիմա ամեն ինչ փոխվել է։ Մենք անցած ձմռանը մենք ջեռուցումն ամենացածրի վրա էինք թողել ու շատ տաք էր՝ պատերի ջերմամեկուսացման շնորհիվ։»

Տիկին Անդրեասյանը նաև նշում է, որ վերանորոգված լուսավոր դասասենյակները դրական ազդեցություն ունեն երեխաների վրա. «Ես նկատել եմ, որ ուսուցման գործընթացը դարձել է ավելի գրավիչ երեխաների համար և նրանք հիմնականում մեծ ոգևորությամբ են գալիս։ Բայց կարևոր է նշել, որ շենքային պայմանների բարելավումը նաև դրական ազդեցություն ունի մեր՝ անձնակազմի աշխատանքի վրա»։

Նպանատիպ փոփոխությունները պայմանավորված են մանկապարտեզի նոր օդափոխության համակարգով, որն էապես մեծացրել է մաքուր օդի ներհոսքը դեպի սենյակներ։ Նախկինում ըստ ՄԱԶԾ-ի՝ ութ մանկապարտեզներում կատարած չափումների, Co2-ի մակարդակը գերազանցում էր առավելագույն թույլատրելի սահմանաչափը մոտ չորս անգամ: Ներկայում, օդի որակի բարձրացման շնորհիվ երեխաները քնկոտ չեն և ավելի ակտիվ են։

Մերիի մայրը՝ Լուսինեն նույնպես գոհ է մանկապարտեզի վերափոխումից։ «Աղջիկս երկու հրաշալի տարի է անցկացրել այստեղ, և փոփոխություններն իսկապես անհավատալի են։ Պարզապես հիանալի է, որ երեխադ գտնվում է հաճելի, և ամենակարևորը՝ ապահով միջավայրում, հատկապես ձմեռվա ցուրտ օրերին»։ Լուսինեն հավելում է, որ նոր ու հարմարվետ միջավայրը երեխաների առօրյան ավելի բազմազան է դարձրել ու վերջերս մանկապարտեզի սպորտային խմբակը քաղաքային օլիմպիադայում առաջին մրցանակն է ստացել։

Մանկապարտեզի տնօրեն Արուսյակ Ահարոնյանը նշում է է, որ մանկարապտեզի հիմնանորոգումը այն մրցունակ է դարձրել։ «Ջեռուցման, օդափոխության և լուսավորության նորացված համակարգերը ստեղծում են ապահով միջավայր, որն աջակցում է երեխաների բարեկեցությանը և խթանում դրական ուսումնական առօրյան: Մեր օրերում ծնողները շատ պահանջկոտ են, և նախըտրում են իրենց երեխաներին տանել այնպիսի մանկապարտեզ, որն առաջարկում է ժամանակակից հարմարություններ։ Մենք իսկապես երախտապարտ ենք բոլոր դոնորներին մեր մանկապարտեզի նման կարևոր հիմնանորոգումը հնարավոր դարձնելու համար»։

Ծրագիրն իրականացվել է ՎԶԲ, ԿԿՀ, ՄԱԶԾ և Արևելյան Եվրոպայի էներգախնայողության և շրջակա միջավայրի գործընկերության հիմնադրամի և Երևանի քաղաքապետարանի հետ համատեղ ջանքերի շնորհիվ, և արժեցել է մոտ 13,5 մլն ԱՄՆ դոլար։ Ծրագրի շրջանակում ընդհանուր առմամբ հիմնանորոգվել և վերազինվել են Երևանի մոտ 14 մանկապարտեզներ, ուր հաճախում են մոտ ավելի քան 3300 երեխաներ:

Երևանի քաղաքապետարանի քաղաքաշինական ծրագրերի իրականացման բաժնի փոխտնօրեն Մերի Հարությունյանը վստահ է, որ այս հաջող համագործակցությունն էլ ավելի կնպաստի քաղաքի ընդհանուր էներգաարդյունավետությունը։ Նա նշել է, որ մինչև 2029 թվականը «Երևանի էներգաարդյունավետություն» ծրագրի II փուլի շրջանակներում էներգաարդյունավետ վերազինում կունենա ևս 38 շենք։

ՄԱԶԾ և ՎԶԲ ներկայացուցիչները նույնպես հաստատում են, որ կշարունակեն համագործակցությունը միմյանց և քաղաքապետարանի հետ՝ մայրաքաղաքում էներգաարդյունավետությունը զարգացնելու և երեխաների ուսման պայմանները բարելավելու համար:

Սկզբնաղբյուրը՝ https://www.undp.org/