Շենքերի էներգաարդյունավետության առնչվող տեխնիկական հրապարակումների շնորհանդես

2025 թ․ մայիսի 14-ին շինարարական ոլորտի մասնագիտական հանրությանը ներկայացվեցին շենքերի էներգաարդյունավետության վերաբերյալ ՄԱԶԾ - ԿԿՀ «Շենքերի էներգաարդյունավետ արդիականացմանն ուղղված ռիսկերի նվազեցում» ծրագրի շրջանակում լրամշակված տեխնիկական հրապարակումները։

Աշխատաժողովին բացման խոսքով հանդես եկան ՄԱԶԾ Կլիմայի փոփոխության ծրագրի ավագ խորհրդատու տկն․ Դիանա Հարությունյանը , և ՄԱԶԾ-ԿԿՀ ծրագրի համակարգող պրն․ Վահրամ Ջալալյանը։ Նրանք ընդգծեցին էներգաարդյունավետության ինտեգրման ռազմավարական կարևորությունը Հայաստանի շինարարական ոլորտում՝ կլիմայական նպատակներին հասնելու և կյանքի որակը բարելավելու համար։։

«Հիդրոօդերևութաբանության և մոնիթորինգի կենտրոն» ՊՈԱԿ-ի Կլիմայի ծառայության պետ պրն․ Արթուր Գևորգյանը ներկայացրեց Շինարարական կլիմայաբանության թարմացված նորմերը, ընդգծելով դրանց դերը Հայաստանի կլիմայական պայմաններին համապատասխան շենքերի նախագծման գործում։

ՄԱԶԾ-ԿԿՀ ծրագրի համակարգող պրն․ Վահրամ Ջալալյանը ներկայացրեց լրամշակված երկու առանցքային հրապարակումները՝

• Ջերմամեկուսիչ շինարարական նյութերի և շինվածքների տվյալների շտեմարանը և
• Հայաստանում նոր կառուցվող և վերակառուցվող բնակելի, հասարակական և արտադրական շենքերի պատող կոնստրուկցիաների
ջերմամեկուսացման տեխնիկական լուծումների խորհրդատվական ձեռնարկը։

Այս նյութերը կիրառելի են ճարտարապետների, ինժեներների և շինարարների/կառուցապատողների համար փոփոխվող կլիմայի պայմաններում շենքեր նախագծելու, կառուցելու և վերանորոգելու համար։

Քաղաքաշինության կոմիտեի Շինարարության և գիտատեխնիկական ստանդարտացման վարչության պետ տկն․ Ռուզան Ադամյանը ներկայացրեց էներգաարդյունավետությանն առնչվող շինարարական նորմերի մշակման առաջընթացը և իրականացվող բարեփոխումները։

Աշխատաժողովն ավարտվեց մասնագիտական քննարկումով, որտեղ մասնակիցները դիտարկեցին ներկայացված հրապարակումների տեխնիկական ասպեկտներն ու համագործակցության հնարավորությունները։