Ջերմաարդիականացման ազդեցությունը ջեռուցման վարքագծի և էներգիայի ծախսերի վրա. հետազոտության շնորհանդես

2024թ-ի հոկտեմբերի 2-ին կայացել է «Բազմաբնակարան շենքերի էներգաարդյունավետ արդիականացման արդյունքների ազդեցության գնահատում և գենդերային վերլուծություն» սոցիոլոգիական հետազոտության հաշվետվության շնորհանդեսը։ 

Միջոցառմանը ներկա են գտնվել ՄԱԶԾ-ի և Ծրագրի գործընկեր գերատեսչությունների, համայնքային իշխանությունների, միջազգային շահագրգիռ կազմակերպությունների, ՀԿ-ների և լրատվամիջոցների ներկայացուցիչներ։

Հետազոտությունն օգնում է գնահատել բազմաբնակարան շենքերի էներգաարդյունավետ արդիականացման տնտեսական և սոցիալական ազդեցությունը տնային տնտեսությունների ջեռուցման վարքագծի և էներգիայի ծախսերի վրա։

ՀՀ տարածքային կառավարման և ենթակառուցվածքների նախարարության Քաղաքականության վարչության գլխավոր մասնագետ Եղիազար Դավթյանն իր բացման խոսքում բարձր գնահատեց կառավարության և ՄԱԶԾ-ԿԿՀ ծրագրի համագործակցությունը, քանի որ այն միաժամանակ մի քանի խնդիր է լուծում՝ սոցիալ-տնտեսական, էներգետիկ բարեկեցության և բնապահպանական։ 

«Կարևոր է նման հետազոտական աշխատանքը, դրա շնորհիվ կարողանում ենք գնահատել բնակիչների շրջանում ջերմաարդիականացման աշխատանքներից բավարարվածության մակարդակը»,-ասում է Դավթյանը՝ հավելելով, որ օրեցօր ավելանում է այն քաղաքացիների թիվը, ովքեր, տեսնելով իրենց համայնքում ջերմաարդիականացված և արտաքնապես թարմացած շենք, ցանկություն են հայտնում միանալ ծրագրին։

2023 թվականի հոկտեմբեր-նոյեմբերին Գյումրիում, Դիլիջանում և Ստեփանավանում իրականացրած սոցիոլոգիական հետազոտությունը համակարգել է ՄԱԶԾ-ԿԿՀ «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ծրագրի սոցիալական ազդեցության գնահատման և գենդերային հարցերով փորձագետ Աստղիկ Միրզախանյանը:

Նրա խոսքով, հետազոտությամբ հավաքագրված տվյալները օգտագործվելու են էներգաարդյունավետ արդիականացված շենքների պատշաճ կառավարման, դրանց սպասարկման նպատակով պահուստային ֆոնդերի ստեղծման, բնակիչների էներգաարդյունավետ վարքագծի ձևավորման և այլ հարցերի լուծման նպատակով:

«Կանայք և տնային տնտեսուհիները առանցքային դեր են խաղում ընտանեկան բյուջեի հատկացումները որոշելիս, ինչն ընդգծում է նրանց նշանակությունը որպես «փոփոխության գործակալների»՝ ընտանիքում էներգաարդյունավետ վարքագիծը ձևավորելու առումով»,-ասում է Միրազախանյանը։

ՄԱԶԾ Կլիմայի փոփոխության ծրագրերի ավագ խորհրդատու Դիանա Հարությունյանն էլ ընդգծում է, որ թեև սա լայնածավալ հետազոտություն չէ, սակայն կարևոր է վերհանել բնակիչների կարծիքները էներգաարդյունավետ միջոցառումների արդյունքների վերաբերյալ. «Հարցումների ժամանակ հնչած կառուցողական առաջարկություններն էլ կօգնեն հետագայում ավելի ճիշտ կողմնորոշվել որոշ գործողությունների հարցում»:

Զեկույցը հասանելի է հայերեն և անգլերեն լեզուներով: