Համակարգային լուծումներ՝ Հայաստանում էներգաարդյունավետության և վերականգնվող էներգիայի մասշտաբային ընդլայնման համար

Նախորդ շաբաթ Երևանում` ՄԱԿ-ի Զարգացման ծրագիրը, Տարածքային կառավարման և ենթակառուցվածքների նախարարությունը (ՏԿԵՆ) և ՄԱԿ-ի Եվրոպական տնտեսական հանձնաժողովը (UNECE) համատեղ կազմակերպել էին երկօրյա տարածաշրջանային խորհրդատվական ծառայությունների «Hard Talk» ձևաչափով քննարկում։ Հիմնական թեման էր․ ինստիտուցիոնալ խոչընդոտների հաղթահարումը՝ ֆինանսավորման ապահովման և էներգաարդյունավետ շենքերի ջերմամեկուսացման լայնածավալ իրականացում ապահովելու համար։

Բարձր մակարդակի երկխոսությանը բացման խոսքով հանդես եկան ՏԿԵՆ նախարարի տեղակալ Նարեկ Ապիտոնյանը, UNECE-ի էներգետիկայի տարածաշրջանային խորհրդատու Օլեգ Դզյուբինսկին, և ՄԱԶԾ-ԿԿՀ ծրագրի միջազգային ղեկավար Ռուսուդան Տուշուրին։

ՏԿԵՆ նախարարի տեղակալ Նարեկ Ապիտոնյանը մասնավորապես նշեց․
«Շենքերի էներգաարդյունավետության բարելավումը մեր առաջնահերթություններից է, և այս ոլորտը մեծ ներուժ ունի մասնավոր ներդրումներ ներգրավելու և նոր աշխատատեղեր ստեղծելու համար։ Մենք բարձր ենք գնահատում այն հարթակները, որտեղ պետական կառույցները, մասնավոր հատվածը և զարգացման գործընկերները կարող են բաց և կառուցողական երկխոսության միջոցով համատեղ լուծումներ գտնել»։

«Hard Talk»-ի ձևաչափը հնարավորություն տվեց անկեղծ և լուծումներին ուղղված քննարկումների՝ նպատակ ունենալով անցում կատարել այնպիսի մեխանիզմների, որոնք հիմնված չեն դոնորների աջակցության վրա։ Քննարկումները կենտրոնացած էին մասնավոր կապիտալ ներգրավելու գործնական գործիքների շուրջ, այդ թվում՝

🔹 նորարարական, շուկայի վրա հիմնված ֆինանսավորման մոդելներ
🔹 ֆինանսական ռիսկերի նվազեցման գործիքներ
🔹 քաղաքականությունների և կարգավորումների անհրաժեշտ բարեփոխումներ։

ՄԱԶԾ–ԿԿՀ գործող ծրագրի նման նախաձեռնությունների միջոցով Հայաստանն ակտիվորեն առաջ է մղում շուկայի փոխակերպումը՝ համադրելով քաղաքականություններին աջակցությունն ու ամուր գործընկերությունները՝ մասշտաբային և կայուն ազդեցություն ապահովելու համար։ Միասին մենք ձևավորում ենք Հայաստանի և ողջ տարածաշրջանի համար առավել էներգետիկ անվտանգ, դիմակայուն և ցածր ածխածնային ապագա։