Վերապատրաստում՝ Երևանում էներգետիկ կառավարման համակարգի ներդրման և իրականացման ծրագրի շրջանակում

Երևան hամայնքում էներգետիկ կառավարման համակարգի ներդրման և իրականացման ծրագրի շրջանակում էներգետիկ պատասխանատուների համար իրականացվել է կարողությունների զարգացման և վերապատրաստման դասընթաց:

ՄԱԿ-ի զարգացման ծրագրերի հայսատանյան գրասենյակի հետ համատեղ կյանքի կոչվող նախագիծն ընդգրկում է համայնքային շուրջ 320 հասարակական օբյեկտ՝ կրթական, առողջապահական ու մշակութային կենտրոններ, վարչական և գերատեսչական շենք-շինություններ: Վերապատրաստման ծրագրին մասնակցություն է ունեցել նաև Շրջակա միջավայրի նախարարության «Բնապահպանական ծրագրերի իրականացման գրասենյակ» պետական հիմնարկը:

Երևանի քաղաքապետարանի ներկայացուցիչը նշել է, որ Էներգետիկ կառավարման համակարգ ներդնելու հիմնական նպատակը էներգախնայողության և էներգաարդյունավետության բարձրացման միջոցառումների համակարգված իրականացումն է:

«Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ՄԱԶԾ-ԿԿՀ ծրագրի ղեկավար Վահրամ Ջալալյանը, կարևորելով էներգետիկ պատասխանատուների գործառութային հմտությունների զարգացումը, իր հերթին նշել է, որ ՄԱԿ-ի զարգացման ծրագրի հայաստանյան գրասենյակն էներգետիկ կառավարման համակարգը ներդնելու համար Երևանի քաղաքապետարանին շարունակելու է ցուցաբերել բազմակողմանի աջակցություն:

Աղբյուրը https://www.yerevan.am/en/news/verapatrastowm-erewanowm-energetik-karhavarman-hamakargi-nerdrman-ew-irakanats-man-tsragri-shrjanako/